پی ایس ایل معیاری لیگ، پاکستان نے ہمیشہ اچھے فاسٹ باؤلر پیدا کئے: تبریز شمسی

لاہور(سپورٹس رپورٹر)کراچی کنگز کے جنوبی افریقہ سے تعلق رکھنے والے سپنر تبریز شمسی نے کہا ہے کہ پی ایس ایل ایک معیاری لیگ ہے۔لاہور میں میڈیا سے گفتگو کرتے ہوئے تبریز شمسی نے کہا کہ پاکستان میں بائولرز بہت اچھے ہیں، پاکستان نے ہمیشہ اچھے فاسٹ بائولرز پیدا کیے ہیں۔ گزشتہ روز نوجوان کھلاڑیوں نے عمدہ پرفارم کیا، یہی لیگ کی خوبصورتی ہے، پی ایس ایل نوجوان باصلاحیت کھلاڑیوں کیلئے اپنی مہارت سامنے لانے کا ایک اچھا پلیٹ فارم ہے۔ گزشتہ سیزنز کی کارکردگی اب ماضی کا حصہ ہے، آپ چیمپئن بھی ہوں تو پھر بھی آپ کو زیرو سے شروع کرنا پڑتا ہے، ہماری مینجمنٹ نئی ہے، ماحول اچھا بنا ہوا ہے اور ٹریننگ اچھی جا رہی ہے۔بیٹنگ ہمارا مسئلہ نہیں ہے ابھی صرف ایک میچ ہوا ہے، بابر اعظم ایک سپیشل کھلاڑی ہیں وہ ہر جگہ اچھا پرفارم کرتے ہیں وہ اکیلے ٹیم میں بیٹر نہیں دیگر بیٹرز بھی ہیں ہم صرف ایک پر فوکس نہیں کر رہے۔ پی ایس ایل میں اچھی چیز یہ ہے کہ کراؤڈ دونوں ٹیموں کو سپورٹ کرتا ہے، لاہور میں جنوبی افریقہ کی جانب سے ایک میچ کھیل چکا ہوں لیکن تب کرونا کے دن تھے اب لاہور کے کراؤڈ کو انجوائے کروں گا۔