بحیرہ عرب میں پاک، سعودی عرب بحری مشقیں” نسیم البحر“جاری

کراچی (نوائے وقت نیوز) پاک سعودی بحری مشقیں نسیم البحر جاری ہیں۔ اس موقع پر چیف آف نیول سٹاف ایڈمرل آصف سندھیلہ نے کہا ہے کہ بحیرہ عرب میں پاکستان اور سعودی عرب کی بحری مشقیں کسی ملک کے خلاف نہیں ہیں۔ ہماری سب سے بڑی ذمہ داری علاقے میں امن قائم رکھنا ہے۔ جنگی مشقیں نسیم البحر کے تیسرے مرحلے میں پاک بحریہ اور سعودی عرب کی شاہی بحریہ کے جنگی جہازوں نے گہرے سمندر میں مختلف جنگی مشقوں میں حصہ لیا۔ نیول ایوی ایشن کے طیارے اور ہیلی کاپٹرز بھی مشق میں شریک تھے۔ پاک بحریہ کے پی تھری سی اوریان طیارے نے اینٹی سب میرین میزائل ہارپون کے ذریعے زیرآب ہدف کو نشانہ بنانے اور سعودی فریگیٹ مکہ نے اینٹی شپ میزائل کے ذریعہ ہدف کو نشانہ بنانے کا مظاہرہ کیا۔ اس موقع پر میڈیا سے گفتگو کرتے ہوئے پاک بحریہ کے سربراہ ایڈمرل آصف سندھیلہ نے کہا اس سے علاقے میں کسی قسم کی کشیدگی نہیں ہوگی۔
پاک سعودی بحری مشقیں