بصیر پور، فیروز والہ میں گیس لوڈ شیڈنگ، کم پریشر کیخلاف احتجاج 

بصیرپور؍ فیروز والہ (نامہ نگاران) بصیر پور اور فیروز والہ میں گیس کی لوڈ شیڈنگ اور کم پریشر کیخلاف احتجاج کیا گیا ہے۔ محلہ چاہ سیدھنانوالہ میں گیس کا پریشر نہ ہونے پر درجنوں مردوخواتین نے گھروں سے باہر آکر زبردست احتجاج ونعرے بازی کی۔ مظاہرین نے کہا کئی ماہ سے گیس کا پریشر نہ ہونے کے برابر ہے جس کی وجہ سے انہیں مہنگا متبادل ایندھن استعمال کرنا پڑ رہا ہے۔ بیگم کوٹ،  شاہدرہ، کوٹ عبدالمالک، فیروز والا اور دیگر علاقوں میں گیس کی بد ترین لوڈ شیڈنگ، چولہے بند، عوام لکڑیوں اور کوئلے پر کھانا پکانے پر مجبور ہیں، لکڑیوں کی مانگ میں بھی اضافہ ہو گیا۔ بتایا گیا ہے کہ راوی پار کے گردونواح  میں سوئی گیس کی مسلسل اور بد بدترین لوڈ شیڈنگ، بندش کے بعد گیس پریشر کی کمی نے ناصرف گھریلو بلکہ کاروباری زندگی کو بھی بری طرح مفلوج کر رکھا ہے۔ حکام سے صورتحال کی بہتری کیلئے اقدامات کا مطالبہ کیا گیا۔