نواز شریف کل مانسہرہ میں جلسہ، مریم پرسوں لاہور میں ریلی نکالیں گی  

لاہور (این این آئی+ نوائے وقت رپورٹ) مریم نواز 23جنوری منگل کو لاہور میں انتخابی ریلی کی قیادت کریں گی۔  نواز شریف نے مریم نواز کو  این اے 130میں ریلی نکالنے کی ہدایت کی ہے۔ مریم نواز  نواز شریف کی انتخابی مہم کی قیادت کریں گی۔ اس سے قبل مریم نواز اسی حلقے میں اپنی والدہ بیگم کلثوم نواز مرحومہ کی کامیاب انتخابی مہم کی قیادت بھی کر چکی ہیں۔ پارٹی ذرائع کے مطابق مریم نواز 23جنوری کو لیگی رہنما بلال یاسین کے ڈیرہ سے ریلی کاآغاز کریں گی۔ مریم نواز حلقہ پی پی 174سے ریلی نکالیں گی اور پی پی 173 کے مختلف علاقوں میں جائیں گی۔ پاکستان  مسلم لیگ ن کے انتخابی سرگرمیوں کے سلسلے میں 22 جنوری کو مانسہرہ میں قائم ٹھاکرہ سٹیڈیم عوامی پنڈال سجانے کا فیصلہ کیا ہے جس میں نواز شریف خطاب کریں گے۔ این اے 15 سے امیدوار نواز شریف کے استقبال کی ہدایت کر دی ہے۔ نواز شریف 22 جنوری کو مانسہرہ میں جلسے سے خیبر پی کے میں پارٹی کی انتخابی مہم شروع کریں گے۔