پاکستان میوزک انڈسٹری کے معروف گلوکار اور سماجی کارکن شہزاد رائے نے اپنے پرانے گانے 'بھول جا ' کو نئے انداز میں گا کر مداحوں کے دل جیت لیے۔
تفصیلات کے مطابق سماجی رابطے کی ویب سائٹ ٹوئٹر پر گلوکار نے اپنا  گانا ’ بھول جا‘  گاتے اور ساتھ گٹار بجاتے ویڈیو شیئر کی۔  ایک منٹ اور 40 سیکنڈ پر مشتمل ویڈیو شیئر کرتے ہوئے عنوان میں شہزاد رائے نے گانے کے  بول " بیکار ہوتا ہے، جو پیار ہوتا۔۔ لیکن یہ سچ ہے یہ، ایک بار ہوتا ہے"  بھی لکھے ۔انہوں نے اپنے پرانے گانے کی نئی ویڈیو میں بالی ووڈ فلم ’کل ہو نہ ہو‘ کے گانے کے کچھ  بول بھی  خوبصورتی سے شامل کئے ہیں ۔ شہزاد رائے نے آخر میں کہا کہ ’میں نے اس گانے کے اختتام میں ردوبدل کی ہے اورمجھے یقین ہے کہ آپ سب بھی اسے سن کر پرانی یادوں میں چلے جائیں گے ۔ شہزاد رائے کے چاہنے والوں کی جانب سے گانے کے اختتام کو بے حد پسند کیا جارہا ہے ۔ شہزاد کا یہ گانا 2002  میں ریلیز ہونے والے البم میں شامل تھا۔

اس سے قبل  شہزاد رائے کی آواز میں نازیہ حسن کے مشہور گانے ' زندگی ' کو مداحوں کی جانب سے پسند کیا جا رہا ہے۔شہزاد نے سوشل میڈیا پر یہ ویڈیو شئیر کی تھی ۔