لاہور/ شیخوپورہ/ گوجرانوالہ/ (نیوز رپورٹر+ نامہ نگار+ سپیشل رپورٹر+ علاقائی نمائندوں سے) لاہور سمیت ملک کے مختلف حصوں میں مون سون کی بارشوں کا سلسلہ منگل کے روز بھی جاری رہا۔ پی ڈی ایم اے خیبر پی کے کے مطابق بارشوں اور ندی نالوں میں طغیانی سے 6 افراد جاں بحق 7 زخمی ہو گئے۔ کامونکے میں دیوار گرنے سے نوجوان‘ داؤد خیل میں چھت گرنے سے 7 سالہ بچی  بھی جاں بحق ہو گئے۔ چنیوٹ میں حادثات کے باعث کمسن بہن بھائی سمیت 8 افراد زخمی ہو گئے۔ دیگر علاقوں میں بھی حادثات سے متعدد افراد کے زخمی ہونے کی اطلاعات ہیں۔ نجی ٹی وی کے مطابق بارش کے باعث پنجاب میں حادثات سے 5 افراد جاں بحق ہو گئے۔ شیخوپورہ‘ گوجرانوالہ‘ چناب نگر‘ کامونکے‘ چنیوٹ‘ جھنگ‘ کمالیہ‘ نوشہرہ ورکاں‘ سیالکوٹ‘ میانوالی‘ داؤد خیل اور دیگر علاقوں میں بھی بادل  جم کر برسے۔  جھنگ اور مری میں بھی تیز بارش ہوئی۔ مویشی منڈیوں میں بیوپاری جانوروں کو بارش سے بچانے کے جتن کرتے رہے۔ موسلادھار بارش  کے باعث لاہور ائرپورٹ کے فائر سٹیشن میں پانی بھر گیا۔ رن وے اور ایپرن پر بھی پانی جمع ہو گیا۔ ایمرجنسی گاڑیاں بھی پانی اور کیچڑ  میں پھنس کر رہ گئیں۔ بارش کی وجہ سے رائے ونڈ میں چھت گرنے سے 30 سالہ عارف جاں بحق جبکہ چائنا سکیم اور موہلنوال میں بھی چھتیں گرنے سے 10 افراد زخمی ہو گئے۔ تھانہ چوہنگ میں بارش کا پانی بھر گیا تاہم اس کے باوجود اہلکار اپنے کام میں مصروف رہے۔ نجی ٹی کے مطابق  تیز بارش سے ندی نالے بھی بپھر گئے۔ فیصل آباد، نارووال  میں تیز بارش سے نشیبی علاقے زیر آب آگئے۔  سانگلہ ہل، پنڈی بھٹیاں میں جل تھل ایک ہوگیا، بارش کا پانی گھروں میں داخل ہوگیا۔ عیسیٰ خیل میں طوفانی بارش نے تباہی مچا دی، نالہ بھپر گیا۔ طغیانی سے متعدد شہروں کے راستے بند ہوگئے۔ سیکڑوں ایکڑ پر فصلوں کو بھی شدید نقصان پہنچا۔ طغیانی کے باعث غریب وال روال روڈ کئی جگہوں سے بہہ گئی، دوسری جانب دیر بالا کے ندی نالوں میں طغیانی   کے باعث سیاحوں کی گاڑی برساتی نالے میں بہہ گئی اور دو افراد جاں  بحق ہو گئے کوہاٹ کے قریب شکردرہ کے برساتی نالے میں 7 افراد بہہ گئے۔ لاہور  میں بارش کے باعث پروازوں کا شیڈول بھی متاثر ہوا متعدد پروازیں منسوخ ہو گئیں۔لاہور سے نیوزرپورٹر کے مطابق صوبائی دارالحکومت کے مختلف علاقوں میں بارش کے باعث لیسکو کے 300 سے زائد فیڈرٹرپ کر گئے، فیڈر ٹرپ ہونے اور دیگر فنی خرابیوں کے باعث متعدد علاقے بجلی سے محروم ہوگئے ۔لیسکو کے فیلڈ عملے نے بارش کے بعد زیادہ تر علاقوں کی بجلی کی سپلائی بحال کردی ہے۔ دوسری جانب لیسکو چیف چودھری امین نے عید کی چھٹیوں میں عملے کو  الرٹ رہنے کا حکم دیا ہے  اور عید کی تعطیلات میں تمام علاقوں میں سپیشل دیوٹیاں لگادی ہیں۔ کامونکے سے نامہ نگار کے مطابق بوسیدہ دیوار گرنے سے ملبہ تلے دب کر ستائیس سالہ نوجوان سبحان جاں بحق ہو گیا۔ داؤدخیل سے نامہ نگار کے مطابق طوفانی بارشوں سے سوہان برج تا مسان ریلوے سٹیشن کے درمیان ریلوے لائن بیٹھ گئی اور ملتان  میانوالی تا اٹک راولپنڈی سیکشن کی ٹرینیں روک دی گئیں۔ ماڑی تا اٹک ملتان تا راولپنڈی ٹرینیں راستے میں ہی روک دی گئیں۔ نوشہرہ ورکاں  سے نمائندہ نوائے وقت کے مطابق بارش سے حسب سابق گلیاں اور سڑکیں ندی نالوں کا منظر پیش کرتی رہیں۔ چنیوٹ سے نمائندہ نوائے وقت کے مطابق چنیوٹ  میں بارش چھتیں اور دیوار گرنے سے کمسن بہن بھائی عائشہ اور فہد خاتون شاہینہ سمیت آٹھ افراد زخمی ہو گئے۔ شیخوپورہ سے نمائندہ خصوصی کے مطابق  بارش نے سیوریج سسٹم پر اٹھنے والے اربوں روپے کے اخراجات پر بھی سوالیہ نشان کھڑا کر دیا ہے۔ گوجرانوالہ سے نمائندہ خصوصی کے مطابق بارش کے باعث عالم چوک کے قریب بوسیدہ مکان کی چھت گر گئی ملبے تلے دب کر 35 سالہ ہادیہ اور اس کا 6 سالہ بیٹا زمان شدید زخمی ہو گئے۔ لاہور سے نامہ نگار کے مطابق بارش کے دوران چائنہ سکیم میں اہلخانہ سو رہے تھے کہ اچانک چھت گر گئی۔ جس کے ملبے تلے دب کر ایک ہی خاندان کے 6 افراد زخمی ہو گئے۔ زخمیوں میں میاں بیوی‘ چار بچے بتائے جاتے ہیں جنہیں ہسپتال منتقل کر دیا گیا۔ جبکہ موہلنوال میں چھت گرنے سے 3 افراد زخمی ہو گئے۔ لاہور سے سپیشل رپورٹر کے مطابق پنجاب‘ کشمیر‘ خیبر پی کے‘ بلوچستان اور گلگت بلتستان میں تیز ہواؤں اور گرج چمک کے ساتھ بارش ہوئی۔ سب سے زیادہ بارش منڈی بہاؤالدین میں 99 ملی لیٹر ریکارڈ کی گئی۔ آج اسلام آباد ‘ پنجاب‘ خیبر پی کے‘ کشمیر‘ گلگت بلتستان اور شمالی بلوچستان میں گرج چمک کیساتھ بارش کا امکان ہے۔