لاہور(خصوصی رپورٹر)پاکستان مسلم لیگ (ن)کے صدر اور قائد حزب اختلاف شہبازشریف نے آزادجموں وکشمیر کے عوام کے والہانہ جذبے کو خراج تحسین کرتے ہوئے کہا ہے کہ آزاد جموں وکشمیر کا الیکشن باشعور کشمیریوں کے محمد نوازشریف کی قیادت پر اعتماد کا تاریخی فیصلہ ہوگا ، آزادجموں وکشمیر کے عوام کے لئے نوازشریف کی قیادت میں تعمیر، ترقی، خوشحالی کے ایک نئے دور کا آغاز کریں گے، اپنے ایک بیان میں شہباز شریف نے کہا کہ آزادجموں وکشمیر میں موٹرویز، تعلیم وصحت اور عوام کی ترقی کے مثالی منصوبے لائیں گے، انہوں نے کہا کہ اللہ تعالی کے کرم سے پاکستان مسلم لیگ (ن)کے ساتھ کشمیر کے عوام نے تاریخی محبت کا اظہار کیا ہے، کامیاب الیکشن مہم پر نون لیگ کے تمام رہنمائوں، کارکنان اور عوام کو خراج تحسین پیش کرتا ہوں آزاد جموں وکشمیر کے عوام باشعور اور اہل بصیرت ہیں، ووٹ کی طاقت سے اپنے حقوق کی حفاظت کریں گے،  شہباز شریف نے کہا کہ پاکستان کے عوام کو مایوس اور مجبور کرنے والے آزادجموں وکشمیر کے عوام کو کچھ نہیں دے سکتے، نوازشریف کی قیادت میں جس طرح پنجاب سمیت پورے ملک کو ترقی دی، آزادکشمیر کے عوام کو بھی ان کا حصہ دیں گے۔ پاکستان مسلم لیگ (ن)کے صدر شہبازشریف نے  عالم اسلام کوحج اور عیدالاضحی کی مبارک باد دیتے ہوئے کہاکہ پاکستان اور دنیا بھر کے مسلمانوں کو عیدقربان کی مبارک دیتا ہوں۔حج کی سعاد ت حاصل کرنے والے خوش نصیبوں کو بھی مبارک دیتے ہیں ،حج اس مرتبہ کرونا وبا کے مصائب میں آیا ہے۔ اللہ تعالی اس موذی مرض سے دنیا کو نجات دے۔حج اور عید الاضحی کے مقدس دن ساتھ ساتھ آنا اللہ تعالی کی خاص رحمت کا مظہر ہے ۔عید قرباں اللہ تعالی کے جلیل القدر پیغمبر حضرت ابراہیم اور ان کے عظیم بیٹے حضرت اسماعیل  کی فرمانبرداری کی یاد ہے ۔اللہ تعالی کی خوشنودی اور رضا کا حصول ہی اس عظیم دن کا سبق ہے ۔انہوںنے کہاکہ فلسفہ قربانی سمجھتے ہوئے اس کی روح کے مطابق اپنی زندگیوں کو سنوارنا ہوگا، اسی میں دنیا اور آخرت کی بھلائی ہے ۔