اسلام آباد(نمائندہ خصوصی)صدر مملکت ڈاکٹر عارف علوی نے کہا ہے کہ پاکستان کامیابی سے کورونا وبا سے نمٹا ہے، کورونا وبا کی چوتھی لہر کے دوران عوام احتیاطی ضابطہ کار پر مکمل عمل کریں۔ منگل کو ٹک ٹاک اور ٹویٹر پر اپنے ویڈیو پیغام میں انہوں نے کہا کہ پاکستان نے کورونا کے خلاف کامیابی حاصل کی ہے، اس میں حکومت کے بروقت اور اچھے فیصلوں کا ہاتھ ہے، پاکستان کے مقابلہ میں بھارت اس وبا سے زیادہ متاثر ہوا ہے۔ انہوں نے کہا کہ کورونا وبا کے دوران میڈیا اور علما کرام نے آگاہی فراہم کرنے میں تعاون فراہم کیا جبکہ حکومت نے عوام کو ریلیف دینے کیلئے موثر اقدامات کئے۔ وزیراعظم عمران خان نے کہا کہ لاک ڈا?ن نہیں کریں گے ، غریبوں کے روزگار کا خیال رکھیں گے۔ انہوں نے کہا کہ اس وقت کورونا وبا کی چوتھی لہر چل رہی ہے اور ڈیلٹا وائرس تیزی سے پھیل رہا ہے، جانوروں کی خریداری اور عیدالاضحیٰ کی نماز کی ادائیگی کے دوران کورونا سے بچاؤکے احتیاطی ضابطہ کار پر مکمل عمل کریں، ہاتھ دھوئیں، ماسک پہنیں اور سماجی فاصلہ برقرار رکھیں، بازاروں میں بھی احتیاطی ضابطہ کار پر عمل یقینی بنایا جائے۔ انہوں نے کہا کہ ملک اقتصادی ترقی کی راہ پر گامزن ہے، اگر کورونا وبا کی اس لہر کا کامیابی سے مقابلہ کر لیا تو کوئی بھی پاکستان کی ترقی کی راہ میں رکاوٹ نہیں ڈال سکتا۔