جرمنی کے شہر فرینکفرٹ میں پاکستانی قونصل جنرل کے باہر افغان باشندوں نے ہنگامہ آرائی کی. پاکستان نے واقعہ پر شدید مذمت کی ہے۔
تفصیلات کے مطابق ترجمان دفتر خارجہ نے فرینکفرٹ جرمنی میں افغان شہریوں کی جانب سے اپنے قونصل خانے پر حملے کی شدید مذمت کی۔ترجمان دفتر خارجہ ممتاز زہرہ بلوچ کی جانب سے جاری بیان میں کہا کہ فرینکفرٹ قونصل خانے میں توڑ پھوڑ کی مذمت کرتے ہیں، فرینکفرٹ میں پاکستان کے قونصل خانے کی سلامتی کو خطرے میں ڈالا گیا۔ترجمان دفتر خارجہ نے کہا کہ جرمن حکومت کو اپنے شدید احتجاج سے آگاہ کر رہے ہیں، جرمن حکومت پاکستانی سفارتی مشنز اور عملے کی سلامتی کو یقینی بنانے کیلئے اقدامات کرے۔پاکستان نے جرمنی کی حکومت سے مطالبہ کیا کہ وہ ویانا کنونشنز کے تحت اپنی ذمہ داریوں کو پورا کرے. جرمن حکام پر زور دیا کہ وہ واقعے میں ملوث افراد کو گرفتار کریں۔ترجمان دفتر خارجہ نے مزید کہا کہ سیکیورٹی کی خامیوں کے ذمہ دار افراد کو بھی جوابدہ ٹھہرائیں۔
واضح رہے کہ جرمنی کے شہر فرینکفرٹ میں افغان شہریوں کی جانب سے پاکستانی قونصل خانے پر پتھراؤ کیا گیا اس واقعے کے بعد پولیس نے دو افراد کو حراست میں لے لیا۔