پولیس کے مطابق دھماکا خیز مواد مزار کے قریب کھڑی گدھا گاڑی میں نصب کیا گیا تھا جس سے زائرین کو نشانہ بنایا گیا، جاں بحق ہونے والوں میں ایک معمرشخص اور دو کمسن بچیاں شامل ہیں۔ اطلاع ملتے ہی ریسکیو ٹیمیں جائے وقوعہ پہنچ گئیں اورامدادی کاموں میں حصہ لیا۔ زخمیوں کو لیڈی ریڈنگ ہسپتال منتقل کردیا گیا جہاں بعض زخمیوں کی حالت تشویشناک بتائی جاتی ہے۔ زخمی ہونے والوں میں زیادہ تعداد خواتین اور بچوں کی ہے۔ دھماکے سے مزار کی ایک دیوار بھی منہدم ہوگئی جبکہ قریب کھڑی گاڑیوں کو بھی نقصان پہنچا۔ ادھرصدر زرداری نے دھماکے کی شدید مذمت کرتے ہوئے جاں بحق افراد کے لواحقین سے افسوس کا اظہار کیا ہے اورشرپسند عناصر کے خلاف سختی سے نمٹنے کا عزم دہرایا ہے۔