کراچی (کرائم رپورٹر) کراچی کے مختلف علاقوں میں پُرتشدد واقعات میں کمسن بچے سمیت 3 افراد ہلاک اور ایک شخص زخمی ہو گیا۔ تفصیلات کے مطابق سولجر بازار کے علاقے پٹیل پاڑہ میں جھگڑے کے دوران ایک شخص طارق شاہ ولد منیر شاہ کو چھری کے وار کر کے ہلاک کر دیا گیا‘ واقعہ پٹیل پاڑہ میں سنہری مسجد کے قریب پیش آیا۔ مقتول طارق شاہ کی لاش پوسٹ مارٹم کےلئے سول اسپتال پہنچائی گئی جبکہ پولیس نے تفتیش شروع کر دی ہے۔ ادھر نیو کراچی کے علاقے لاسی گوٹھ میں کمسن بچے کی لاش ملی جسے تشدد کر کے ہلاک کیا گیا تھا‘ پولیس کے مطابق بچے کی عمر تقریباً ساڑھے 3 سال تھی جس کی شناخت حسن علی کے نام سے ہوئی ہے جو ایک روز قبل لاپتہ ہو گیا تھا۔ دریں اثناءفیروز آباد کے علاقے ہل پارک کے قریب نامعلوم افراد کی فائرنگ سے ایک شخص منظر شاہ زخمی ہو گیا۔ اس کے علاوہ جہانگیر روڈ نمبر ایک پر منگل کی شام مسلح افراد نے فائرنگ کر کے ایک شخص کو ہلاک کر دیا۔ پولیس کے مطابق مقتول کی عمر 35 سال تھی۔
کراچی ہلاکتیں