گجرات:زمین کے تنازعہ پر 2 افراد قتل ،تھانیدارسمیت 3زخمی 

گجرات(  نامہ نگار)جلالپورجٹاں میں زمین تنازعہ پر دو گروپوں میں فائرنگ 2افراد قتل جبکہ پولیس اہلکار سمیت 3افراد زخمی ہوگئے ۔ تفصیلات کے مطابق جلالپورجٹاں کے علاقہ نند پور کے قریب اراضی تنازعہ پر دو گروپوں کے درمیان فائرنگ شروع ہو گئی جس کے نتیجہ میں ناصر مہر سکنہ لالے والا کھوہ جلالپورجٹاں اور سجاول بٹ ہلاک ہو گئے جبکہ گولیاں لگنے سے اے ایس آئی مظہر حسین،محمد صدیق سمیت تین افراد زخمی ہو گئے جنہیں طبی امداد کیلئے عزیز بھٹی شہید ہسپتال منتقل کر دیا گیا۔ پولیس کے مطابق ملزمان کی گرفتاری کیلئے ٹیمیں تشکیل دیدی گئی ہیں جبکہ نعشیں پوسٹمارٹم کیلئے ہسپتال پہنچا کر واقعہ کی تحقیقات کا آغاز بھی کر دیا گیا ہے۔