سستے داموں اشیاء کی فراہمی میں اتوار بازار اہم کردار ادا کر رہے ہیں : بلال یٰسین

لاہور(نیوزرپورٹر)صوبائی وزیر خوراک بلال یاسین نے کہاہے کہ عوام کو سستے دامو ںمعیاری اشیاء خوردونوش کی فراہمی میں اتوار بازار اہم کرداراد ا کررہے ہیں -ان بازاروں کے توسط سے عام آدمی کی غذائی ضروریات کو پوراکرنے میں مدد ملی ہے- ان اتوار بازاروں کی افادیت کو دیکھتے ہوئے ا ن کا دائرہ کار مزید بڑھایا جائے گا تا کہ زیادہ سے زیادہ لوگوں کی رسائی ممکن ہو اور لوگوں کو مہنگائی سے نجات ملے-ان خیالات کا اظہار انہوں نے آج شادمان اتوار بازارکے دورے کے موقع پر صارفین سے گفتگو کرتے ہوئے کیا- ان کے ہمراہ ٹی ایم او داتا گنج بخش ٹائون بھی موجود تھے ۔ صوبائی وزیر نے کہاکہ اتوار بازاروں میں کوالٹی اشیاء ،خوردونوش اور تازہ پھلوں کی فراہمی پر خصوصی توجہ دی جا رہی ہے اور اس حوالے سے مڈل مین کا کردار ختم کر کے کسانوں کو موقع دیا گیاہے کہ وہ اپنی زرعی اجناس براہ راست عوام کوفروخت کریں اور اپنی محنت کا معقول معاوضہ پائیں۔