اسلام آباد (سٹاف رپورٹر) پاک فضائیہ کے سربراہ ائر چیف مارشل مجاہد انور خان نے ونگ کمانڈر نعمان اکرم شہید کے اہل خانہ سے ملاقات کی۔ شہید کمانڈر کیلئے فاتحہ خوانی اور ان کے درجات کی بلندی کیلئے دعا کی۔ انہوں نے پاک فضائیہ کے بہادر جوان کو خراج عقیدت پیش کرتے ہوئے کہاکہ شہید پائلٹ نے مادر وطن کے تحفظ کیلئے اپنی جان کی قربانی دی ان کی شہادت کو ہمیشہ یاد رکھا جائے گا۔ اس سے پہلے پاک فضائیہ کے سربراہ پی اے ایف بیس مصحف پہنچے جہاں انہوں نے ونگ کمانڈر نعمان اکرم شہید کا یونٹ نمبر نو ملٹی رول سکوارڈن کا دورہ کیا۔پاک فضائیہ کے سربراہ نے سکورڈن کے جنگی عملے کے ہمراہ ایف سولہ لڑاکا طیارے میں آپریشنل تربیتی پرواز بھی کی۔