جاتی امراء میں حمزہ لیگ‘ مریم لیگ میں میچ جاری‘ سب کنیزیں خاموش: فردوس عاشق 

لاہور (نوائے وقت رپورٹ) معاون خصوصی برائے اطلاعات ڈاکٹر فردوس عاشق اعوان نے کہا ہے کہ جعلی راجکماری اور ولی عہد میں قیادت کی رسہ کشی شروع ہو چکی ہے۔ جاتی امرا میں حمزہ لیگ اور مریم لیگ کے درمیان میچ جاری ہے۔ ن لیگ کے وراثتی اجلاس صبح دوپہر شام ہو رہے ہیں ان اجلاسوں کے بارے میں کینز اول‘ دوئم‘ سوئم سب خاموش ہیں۔ ن لیگ کے وراثتی اجلاسوں پر  راجکماری کا ٹویٹر بھی گنگ ہو چکا ہے۔ زرداری نے وقت نہیں مانگا نواز شریف اور اسحاق ڈار کو مانگا ہے فضل الرحمان پر بڑا ترس آ رہا ہے جسے اس کے اپنے اتحادی استعفے نہیں دیتے وہ وزیراعظم عمران خان سے استعفیٰ مانگ رہا ہے۔ ان خیالات کا اظہار انہوں نے ایوان وزیراعلیٰ میں لاہور میں صفائی کی صورتحال پر پریس کانفرنس سے خطاب کرتے ہوئے کیا۔ معاون خصوصی نے کہا شہر کو صاف ستھرا رکھنا اور اس کے قدرتی حسن کی بحالی اور ایک چیلنج ہے لیکن ماضی کے حکمرانوں نے من پسند ٹولے کو نوازنے کیلئے شہریوں کی جیبوں کی صفائی کر ڈالی ڈالروں میں کئے گئے معاہدے کی وجہ سے جوں جوں ڈالر مہنگا ہوا شہریوں کو دہرا نقصان اٹھانا پڑا ڈاکٹر فردوس عاشق نے کہا کہ رانا ثناء وکیل کے پیچھے چھپنے کی بجائے عدالت کی معاونت کریں تاکہ قوم کو پتہ چل سکے کہ کون منشیات کی آڑ میں معاشرے میں زہر گھولتے رہا اور لوٹ مار کرتا رہا۔  معاون خصوصی برائے اطلاعات ڈاکٹر فردوس عاشق اعوان نے چیئرمین روڈا کے استعفے کے حوالے سے کہا کہ ملک کو ترقی کے منادل پر لے جانے کیلئے عمران خان جس سپیڈ سے کام کر رہے ہیں ان کو اپنے ساتھ کام کرنے والی ٹیم بھی اسی سپیڈ کی حامل چاہئے۔