خاصہ دار فورس کے مطابق تحصیل لنڈی کوتل میں بائی پاس روڈ پر نیٹو کے آئل ٹینکر میں گزشتہ روز شام کے وقت دھماکہ ہوا تھا جس کے بعد مقامی افراد نے ٹینکر میں لگنے والی آگ پر قابو بھی پالیا تھا۔ امدادی کارروائیاں جاری تھی کہ اسی دوران رات گئے ایک بار پھر آئل ٹینکر میں زوردار دھماکہ ہوا اور آگ بھڑک اٹھی۔ آگ کی زد میں آکر ٹینکر کے پاس موجود چھ افراد موقع پر جاں بحق جبکہ متعدد زخمی ہوگئے۔ زخمیوں کو تحصیل ہیڈ کوارٹرسپتال منتقل کیا گیا جہاں مزید تیرہ افراد زخموں کی تاب نہ لاتے ہوئے چل بسے۔ جاں بحق ہونے والوں میں ایک ہی خاندان کے دس افراد بھی شامل ہیں۔ دوسری جانب ایک اور واقعے میں افغان سرحد کے قریب طورخم بازار میں قائم نیٹو ٹرمینل میں دھماکے کے بعد آگ بھڑک اٹھی۔ دو گھنٹے کی جدوجہد کے بعد فائر بریگیڈ کے عملے نے آگ پر قابو پایا۔ اس دوران ٹرمینل پر موجود نیٹو کے پانچ آئل ٹینکرز مکمل طور پر تباہ ہوگئے، تاہم کوئی جانی نقصان نہیں ہوا۔