کراچی+ اسلام آباد (نوائے وقت رپورٹ+ نمائندہ خصوصی) پیپلزپارٹی کے چیئرمین بلاول بھٹو زرداری سے بلاول ہاؤس میں وزیر اعلیٰ سندھ سید مراد علی شاہ نے ملاقات کی۔ سندھ کی سیاسی و انتظامی صورتحال پر بات چیت کی گئی۔ بلاول بھٹو سے رکن سندھ اسمبلی خرم سومرو اور سابق ایم پی اے لیاقت آسکانی نے ملاقات کی۔ ارکان اسمبلی نے علاقائی مسائل پر چیئرمین بلاول بھٹو سے تبادلہ خیالات کیا۔  پیپلز پارٹی کے چیئرمین بلاول بھٹو زرداری نے این اے 148 کے ضمنی الیکشن میں پی پی پی امیدوار علی قاسم گیلانی کو تاریخی کامیابی پر مبارک باد دی۔ پیغام میں کہا کہ علی قاسم گیلانی کی کامیابی ملتان کے جیالوں کی محنتوں کا ثمر اور پاکستان پیپلز پارٹی پر عوام کے غیرمتزلزل اعتماد کی دلیل ہے۔ امید ہے کہ علی قاسم گیلانی ایوان میں ملتان کے عوام کی بھرپور آواز بنیں گے۔ چیئرمین بلاول بھٹو زرداری نے کہا کہ علی قاسم گیلانی کی کامیابی پر یوسف رضا گیلانی اور ان کے اہلخانہ کے تمام افراد سمیت ملتان کے عوام کو مبارکباد پیش کرتا ہوں۔