جنرل ساحرشمیشاد سے آسٹریلوی چیف آف ڈیفنس کی ملاقات دفاعی تعاون پر بات چیت

اسلام آباد (خبرنگارخصوصی) چیف آف ڈیفنس فورسز آسٹریلیا جنرل اینگس جے کیمبل نے چیئرمین جوائنٹ چیفس آف سٹاف کمیٹی جنرل ساحر شمشاد مرزا سے جوائنٹ چیف سٹاف ہیڈکوارٹرز میں ملاقات کی۔ آئی ایس پی آر کے مطابق آسٹریلوی چیف آف ڈیفنس فورسز جنرل ایگنس جے کیمبل ان دنوں پاکستان آسٹریلیا دفاعی اور سیکیورٹی مذاکرات کے 13ویں رائونڈ جبکہ 1.5 ٹریک سیکیورٹی ڈائیلاگ کے 10ویں دور میں شرکت کے لیے پاکستان کے سرکاری دورے پر ہیں۔ ملاقات کے دوران دونوں اعلیٰ عسکری رہنماوں نے دفاعی اور سکیورٹی تعاون، علاقائی معاملات اور عالمی سلامتی کے چیلنجز پر جامع بات چیت کی۔ دونوں اطراف نے دونوں ممالک کے درمیان سیکورٹی اور دفاعی تعاون کو مزید مضبوط اور بڑھانے کے عزم کا اعادہ کیا۔آسٹریلوی معززین نے پاکستان کی مسلح افواج کے اعلیٰ پیشہ وارانہ معیار، دہشت گردی کے خلاف جنگ میں ان کی کامیابیوں اور علاقائی امن و استحکام کے لیے جاری کوششوں کو سراہا۔ قبل ازیں جوائنٹ سٹاف ہیڈ کوارٹر پہنچنے پر جنرل اینگس جے کیمبل کو تینوں مسلح افواج کے چاق و چوبند دستے نے "گارڈ آف آنر" پیش کیا۔