مریدکے+ فیروزوالا (نامہ نگاران) جی روڈ پر کھوڑی کے قریب موٹر وے پولیس اور مشکوک کار سواروں کے درمیان فائرنگ کا تبادلہ ہوا جس میں مبینہ دہشت گرد زخمی ہوا جسے 2 ساتھیوں سمیت گرفتار کرلیا گیا۔ بتایا گیا ہے کہ لاہور سے پشاور جانیوالی کار میں سوار مشکوک افراد کالاشاہ کاکو ٹول پلازہ پر نہ رکے جس پر موٹر وے پولیس نے تعاقب کیا۔ کھوڑی کے قریب کار سواروں نے گاڑی کچی سڑک پر روک کر فائرنگ شروع کردی۔ پولیس نے جوابی کارروائی کی جس سے ایک مبینہ دہشت گرد آفتاب خان زخمی ہو گیا۔ پولیس نے فرار ہونیوالے اسکے دو ساتھیوں سراج خان اور رحمت اللہ خان کو پکڑ کر مریدکے پولیس کے حوالے کردیا۔ ملزمان کے قبضہ سے ممنوعہ اسلحہ، منشیات بھی برآمد ہوئی ہے۔ مبینہ دہشت گردوں کا تعلق پشاور سے بتایا جاتا ہے۔