ملتان (سپیشل رپورٹر)نائب امیر جماعت اسلامی پاکستان و صدر سیاسی انتخابی امور کمیٹی لیاقت بلوچ نے تحریک لبیک کے سربراہ علامہ خادم حسین رضوی کے انتقال پر صدمہ ،دکھ اور افسوس کا اظہار کیا ہے اور کہا ہے کہ مرحوم نے قلیل مدت میں عشق مصطفی ؐ کے جذبوں کو فراوانی دی اور پورے ملک میں ایک لہر پیدا کی۔علامہ خادم حسین رضوی اہل سنت مسلک کے نمایاں رہنما کی حیثیت اختیار کرگئے تھے۔دینی جماعتوں اور نظام مصطفی ؐ کی جدوجہد کرنے والوں کا یہ مشترکہ نقصان ہے۔علامہ خادم حسین رضوی کی خطابت،کلام اقبال اور اسلامی تاریخ سے مزین گفتگو تادیر قائم رہے گی۔ لیاقت بلوچ نے مرکزی سیاسی مشاورتی کونسل میں شریک سندھ ،پنجاب اور خیبر پختونخواہ کے قائدین سے گفتگو کرتے ہوئے کہا کہ جماعت اسلامی معاشرہ کے ہر کارآمد ،محب دین اور محب وطن شیخصیات کو اسلام کی حکمرانی اور ملک کو بحرانوں سے نکالنے کی جدوجہد میں ساتھ لیکر چلے گی۔