شاہین آفریدی کی عفیف حسین سے معذرت

لاہور(سپورٹس رپورٹر)فاسٹ بائولر شاہین آفریدی نے بنگلہ دیشی بیٹر عفیف حسین سے معذرت کر لی۔  عفیف حسین نے شاہین کو چھکا رسید کیا تھا۔  اگلی ہی گیند کو عفیف نے روک لیا  تاہم فالو تھرو میں گیند اٹھا کر شاہین آفریدی نے وکٹ کی جانب ماری جو  عفیف حسین کے پاؤں پر لگی جس کے بعد وہ گر پڑے۔عفیف کو اٹھانے کیلئے شاہین آفریدی اور دیگر پاکستانی کھلاڑی پہنچے، عفیف اٹھے اور انہیں ان کے فیزیو نے طبی امداد دی۔ پاکستان کرکٹ بورڈ نے میچ کے اختتامی لمحات کی ویڈیو شیئر کی ہے جس میں دیکھا جاسکتا ہے کہ شاہین آفریدی عفیف حسین سے خوشگوار موڈ میں ملاقات کر تے ہوئے انہیں گلے لگا رہے ہیں۔