پڑپوتی سرگنگا رام کی دادا کی سمادھی پر حاضری‘ پاکستان سے اظہار تشکر

لاہور (خصوصی نامہ نگار) رائے بہادر سر گنگا رام کی پڑپوتی امریکی سینیٹر کیشا رام ہینسڈیل نے دیگر کے ساتھ اپنے پڑدادا کی سمادھی پر حاضری دی۔ متروکہ وقف املاک بورڈ کے ذمہ داران، سنگت کے ارکان، سول سوسائٹی اور گنگا رام ٹرسٹ سے وابستہ عہدیداروں نے اْن کا استقبال کیا۔ مہمان کی آمد کے باعث سمادھی کو انتہائی خوبصورتی سے سجایا گیا تھا۔ سینیٹر کیشا رام نے سمادھی پر خراج عقیدت پیش کیا جس کے بعد مذہبی رسومات ادا کی گئیں۔ کیشا رام نے تقریب کے بہترین انتظامات کرنے اور سمادھی اور اس کے احاطے کی اچھی طرح دیکھ بھال کرنے پر حکومت پاکستان بالخصوص متروکہ وقف املاک بورڈ کا تہہ دل سے شکریہ ادا کیا۔ اس کے بعد امریکی سینیٹر اور متروکہ وقف املاک بورڈ کے درمیان یادگاری شیلڈز کا تبادلہ بھی ہوا۔