فیروزوالہ(نامہ نگار)جی ٹی روڈ اور کالاخطائی روڈپرٹریفک کے مختلف حادثات میں نو عمر لڑکے سمیت3 افراد ہلاک اور 5 افراد زخمی ہو گئے جن کو ہسپتال داخل کرا دیا ۔ کالا خطائی روڈ پرکرول سٹاپ کے قریب ٹریکٹر ٹرالی اور منی ٹرک کے درمیان تصادم کے کے نتیجہ میں ٹریکٹر پر بیٹھا ہوا ڈرائیور اور مزدور نو عمر ٹریکٹر سے نیچے جا گرے جو ٹرک کے تلے آگئے۔ 13 سالہ اسد ارشد موقع پر ہلاک جبکہ ڈرائیور اصغر علی کی ٹانگ ٹوٹ گئی جسے ہسپتال داخل کرا دیا گیا۔ رتہ گجراں کے قریب نجی کالج کے طالبعلم عادل اور احمدحسن چھٹی کے بعد موٹرسائیکل پر سوار گاؤں سدھانوالی جارہے تھے کہ سامنے سے آنیوالی موٹرسائیکل سے ٹکراگئے ‘ موٹرسائیکل سوارنامعلوم 40 سالہ شخص موقع پر جاں بحق ہوگیا۔ عادل اور احمد شدید زخمی ہوگئے۔ زخمی طالب علم عادل کی حالت تشویشناک بتائی گئی ہے۔ جی ٹی روڈ پر تیزرفتار گاڑی بے قابو ہو کر موٹر سائیکل سے ٹکرا گئی۔ خاتون ہلاک جبکہ ایک شخص زخمی ہو گیا۔ جی ٹی روڈ پر رکشہ الٹنے سے تین افراد زخمی ہو گئے۔