شریف برادران کی کامیاب حکمت عملی سے پاکستان کا مقام بلند ہو رہا ہے: وحید جہلمی

مانچسٹر (نمائندہ خصوصی)  مسلم لیگ (ن)  برطانیہ کے نائب صدر راجہ وحید جہلمی نے کہا کہ رائے ونڈ سے خوشگوار ہوائوں کے جھونکوں نے نہ صرف پورے پاکستان بلکہ سمندر پار پاکستانیوں کو بھی معطر کر دیا ہے۔ شریف برادران کی کامیاب حکمت عملی سے پاکستان کا نام اور مقام بلند ہو رہا ہے۔ ملک میں سرمایہ کار سرمایہ کاری پر مجبور ہیں۔ وہ وقت دور نہیں جب (ن) لیگ پاکستان کو ایشیا کا ٹائیگر بنا دے گی اور دنیا میں (ن)  لیگ اور پاکستان کا بول بالا ہوگا۔ دراصل شریف برادران پاکستان کے تحفظ کی جنگ لڑ رہے ہیں۔ ان کے نزدیک پاکستان اور پاکستانی قوم کے حقوق و مفادات عزیز ہیں جبکہ تحریک انصاف و پی پی مفادات کی ہوس میں عوام کا خون چوس رہے ہیں۔ آج بلاول بھٹو کی صورت میں عوام کو ایک مرتبہ پھر بے وقوف بنانے کی عملی کوشش کی جا رہی ہے۔ عوام جانتے ہیں کہ بلاول بھٹو جو کہہ رہے ہیں خود انہیں اس بات کی سمجھ نہیں آتی۔ یہ سب ایک کھیل ہے اور اس کھیل کے ذریعے  عوام کو سنہرے خواب دکھائے جا رہے ہیں‘ لیکن عوام اب باشعور  ہو چکے ہیں۔وہ پی پی پی اور تحریک انصاف کے بہکاوے میں نہیں آئیں گے۔ عوام میاں محمد نوازشریف کے حق میں فیصلہ دے چکے ہیں۔ وہی ان کے ہردلعزیز رہنما ہیں۔ راجہ وحید جہلمی نے برطانیہ میں (ن) لیگ  صدر  زبیر گل کو خراج تحسین پیش کرتے ہوئے کہا کہ زبیر گل کی خدمات کارکنان  کیلئے مشعل راہ ہیں جنہوں نے دن رات کی محنت سے آمریت کے دور میں ذاتی مفادات سے بالاتر ہوکر پارٹی کی خدمت کی۔ زبیر گل (ن) لیگ کا سرمایہ ہیں جن کے ہر حکم پر کارکنان لبیک کہنے پر تیار ہیں۔ (ن) لیگ برطانیہ زبیر گل کی قیادت میں منظم و متحرک ہے اور کسی بھی آفت کا مقابلہ کرنے کو تیار ہے۔ اوورسیز پاکستانی زبیر گل کی قیادت پر اعتماد کا اظہار کرتے ہیں جو دن رات ان کی خدمت کیلئے کوشاں رہتے ہیں۔