پاکستان ‘بھارت کرکٹ ہر حال میں ہونی چاہئے:یونس خان

لاہور(نمائندہ سپورٹس+سپورٹس رپورٹر )پاکستانی کرکٹ ٹیم کے سینئر بلے باز یونس خان پاکستان بھارت کرکٹ کو اس خطے میں کرکٹ کے فروغ کے لیے بہت ضروری سمجھتے ہیں اور ان کا کہنا ہے کہ سیاست کو کھیل سے بالکل الگ رکھنا چاہیے۔ جب بھی پاکستان اور بھارت ایک دوسرے سے دنیا کے کسی بھی حصے میں کھیلتے ہیں تو میدان بھر جاتے ہیں۔اس کرکٹ کو دنیا دیکھتی ہے اور اس کی زبردست مقبولیت ہے لہٰذا ضروری ہے کہ پاکستان بھارت کرکٹ کو سیاست سے دور رکھتے ہوئے ہر حال میں ہونا چاہئے‘خطے میں کرکٹ کو فروغ ملے گا۔ پاکستان اس وقت ٹیسٹ کرکٹ کی اہم ترین ٹیموں میں سے ایک ہے لہٰذا پاکستان کو زیادہ سے زیادہ تعداد میں ٹیسٹ میچز ملنے چاہئیں‘ خواہش ہے پاکستان میں دوبارہ بین الاقوامی کرکٹ شروع ہو۔ دنیا بھر میں بہت زیادہ ٹی ٹونٹی اور ون ڈے کرکٹ ہورہی ہے لیکن ٹیسٹ کرکٹ سے محبت کرنے والے لوگ بھی بہت بڑی تعداد میں ہیں اس کے علاوہ کسی بھی کرکٹر کی اصل اہمیت اس کے ٹیسٹ میچز سے ظاہر ہوتی ہے۔یونس خان کو ٹیسٹ کرکٹ میں دس ہزار رنز کی تکمیل کے لیے پانچ سو چوالیس رنز درکار ہیں۔ ان کا کہنا ہے کہ وہ کبھی بھی ریکارڈ کے لیے نہیں کھیلے لیکن وہ اپنے دس ہزار رنز تک جلد سے جلد پہنچنا چاہتے ہیں۔ یہ ان کے لیے بہت بڑے اعزاز کی بات ہوگی کیونکہ وہ یہ سنگ میل عبور کرنے والے پہلے پاکستانی کرکٹر ہوں گے۔