سرائے عالمگیر، بونگہ حیات (نامہ نگاران) حکومتی دعووں کے برعکس مختلف شہروں میں بجلی کی لوڈشیڈنگ جاری ہے۔ سرائے عالمگیر میں بجلی کی غیراعلانیہ لوڈشیڈنگ سے عوام کی مشکلات میں اضافہ ہو گیا۔ شہر اور اسکے مضافاتی علاقوں میں دن اور رات کے اوقات میں مسلسل بجلی کی غیراعلانیہ لوڈشیڈنگ کے شروع ہونیوالے سلسلے نے نظام زندگی درہم برہم کر کے رکھ دیا۔ بونگہ حیات میں بھی بجلی کی بدترین لوڈشیڈنگ کا سلسلہ جاری ہے، چوبیس گھنٹوں میں بغیر کسی شیڈول کے گھنٹوں بجلی بند رکھ کر عوام کو ذہنی کوفت میں مبتلا ہیں۔ خاص طور پر رات کے وقت کئی کئی گھنٹے بجلی بند رکھی جاتی ہے۔ ظفروال میں بجلی کی لوڈشیڈنگ کا سلسلہ گذشتہ ایک ہفتہ سے جاری ہے۔ دن رات میں آٹھ گھنٹے بجلی بند رہنا روزانہ کا معمول بن چکا ہے۔ شہریوں کا کہنا ہے کہ حکومت نومبر میں لوڈشیڈنگ مکمل ختم کرنے کا اعلان کر رہی ہے لیکن ابھی لوڈشیڈنگ کرنے کا جواز ہے۔