افغان چین انڈر 19نے پاک چین کی مشترکہ ٹیم کو دوستانہ میچ میں ہرا دیا

بیجنگ (این این آئی) افغانستان اور چین کی مشترکہ ٹیم انڈر 19نے پاکستان اور چین کی مشترکہ ٹیم 19کو سہ فریقی دوستانہ ٹی ٹوئنٹی کرکٹ سیریز کے تیسرے میچ میں چھ وکٹوں سے شکست دیدی، پاکستان اور چین کی مشترکہ ٹیم نے مقررہ بیس اوورز میںسات وکٹوں کے نقصان پر 155رنز بنائے ،چین اور افغانستان کی مشترکہ ٹیم نے ہدف 17.3اوررز میں چھ وکٹوں کے نقصان پر حاصل کرلیا ،چین میں کرکٹ کے فروغ کیلئے دونوں ٹیموں میں افغانستان اور پاکستان کے پانچ پانچ کھلاڑی شامل کئے گئے ۔ اتوار کو کھیلے گئے میچ میں پاکستان اور چین کی مشترکہ ٹیم نے ٹاس جیت کر پہلے بیٹنگ کا فیصلہ کیا اور مقررہ بیس اوورز میں سات وکٹوں کے نقصان پر 155رنز بنائے ۔پاکستان اور چین کی مشترکہ ٹیم کی جانب سے پہلے تین کھلاڑی خاص کار کر دگی نہ دکھاسکے اور جلد ہی پویلین لوٹ گئے۔مشترکہ ٹیم کے اوپنر بلے باز صائم ایوب اور ژائو ران چن نے پاکستان کیلئے اننگز کا آغاز کیا لیکن چن دو رنز بنا کر پویلین لوٹ گئے صائم ایوب اچھی بیٹنگ کرتے ہوئے 39رنز بنائے اور رن آئوٹ ہوئے ،صائم کی اننگز میں سات چوکے اور ایک چھکا شامل تھا ۔پانچویں وکٹ کی شراکت میں فہد منیر اور عرفان نیازی نے 65رنز کی شراکت کی ۔