لندن (نوائے وقت رپورٹ) کنگسٹن پیلس نے شاہی جوڑے کے دورہ پاکستان پر ٹوئٹ میں ’’شکریہ پاکستان‘‘ کہا ہے۔ شاہی محل نے شہزادہ ولیم اور شہزادی کیٹ میڈلٹن کے دورہ پاکستان کی ویڈیو جاری کر دی ہے جس میں شہزادہ ولیم اور ان کی اہلیہ کیٹ میڈلٹن کے دورہ پاکستان کی جھلکیاں شامل ہیں۔ شہزادی کیٹ میڈلٹن نے شادی کے بعد پہلا ٹی وی انٹرویو امریکی نشریاتی ادارے ’سی این این‘ کو دیا، ان کا انٹرویو دورے کے تیسرے روز لاہور میں ریکارڈ کیا گیا تھا۔ اپنے پہلے ٹی وی انٹرویو میں شہزادی کیٹ میڈلٹن نے کہا کہ انہیں بطور شاہی فرد پاکستان کے علاوہ دیگر ممالک دیکھنے کا موقع بھی ملا ہے اور انہوں نے اب تک بہترین نظاروں والے ممالک بھی دیکھے ہیں۔ شہزادی کیٹ میڈلٹن نے اپنے مختصر انٹرویو میں پاکستانی سرزمین اور یہاں کے خوبصورت نظاروں کی تعریف کرتے ہوئے کہا کہ انہیں پاکستان کی خوبصورتی دیکھ کر سچ مچ حیرانی ہوئی۔ انہوں نے پاکستان میں ہونے والے سماجی کاموں پر بھی اطمینان کا اظہار کیا اور لاہور کے ایس او ایس ولیج کی بھی تعریف کی اور کہا کہ بچوں کی دیکھ بھال کرنے والے ادارے سے منسلک خواتین انتہائی مثبت سوچ کے ساتھ اہم خدمات سر انجام دے رہی ہیں۔