فائر بریگیڈ عملے کوجدید مشینری فراہم کرنے کے مطالبے کی قرار داد پنجاب اسمبلی میں جمع

لاہور(خصوصی نامہ نگار)مسلم لیگ(ن)کی رکن پنجاب اسمبلی حنا پرویز بٹ نے فائر بریگیڈ عملے کو فوری جدید مشینری فراہم کرنے کے مطالبے کی قرارداد پنجاب اسمبلی میں جمع کرادی۔قرار داد میں کہا گیا کہ فائر برگیڈ کے عملے کو فوری جدید مشینری فراہم کی جائے۔صوبے کی سب سے بڑی میٹروپولیٹن کارپوریشن کے پاس فائر بریگیڈ کی صرف 16 گاڑیاں ہیں۔ جن میں سے 2 خراب اور 5 دھکاسٹارٹ ہیں۔باقی ماندہ گاڑیاں سوا کروڑ کی آبادی والے شہر میں فائر فائٹنگ کے لئے بھاگ دوڑ میں مصروف ہیں۔ 224ملازمین کے لئے وردیاں بھی خواب بن گئیں ہیں۔فائر برگیڈٖملازمین فائر کٹ ،آکسیجن ماسک جیسی بنیادی اہم سہولتوں سے بھی محروم ہیں۔