لاہور(سپورٹس رپورٹر)سکرپٹ پرانا لیکن چہرے نئے آگئے۔محمد حفیظ کی ٹیکنیکل کمیٹی چھوڑنے اور مصباح الحق کی عدم دلچسپی کے بعد ذکاءاشرف نے دوسرے سابق کرکٹرز کو یاد کرلیا۔ذرائع کے مطابق پاکستان کرکٹ بورڈ کے چیئرمین مینجمنٹ کمیٹی ذکاءاشرف نے کرکٹ میں بہتری لانے کےلئے سابق کرکٹر انضمام الحق،محمد یوسف اور عاقب جاوید سے ملاقات کی۔انہوں نے تینوں سابق کرکٹرز سے اپنے اپنے شعبے کی خصوصیات کے پیش نظر مختلف امور پر تجاویز مانگ لیں۔ذکاءاشرف نے کہا کہ قومی ٹیم کو کیسے بہتر بنایا جاسکتا ہے اور کمزوریوں کو کیسے دور کیا جاسکتا ہے آپکی تجاویز بہتری لاسکتی ہیں۔گراس روٹ لیول پر ڈومیسٹک میں اوپنرز، مڈل آرڈر اور باولرز کیسے ڈھونڈے جاسکتے ہیں آپ ہماری مدد کریں۔کھلاڑٰیوں کو نئے دور کی کرکٹ کے حوالے سے کیسے ٹریننگ دی جاسکتی ہے اس پر آپ کی معاونت اہم کردار ادا کرسکتی ہے۔انضمام الحق،محمد یوسف اور عاقب جاوید کی ذکاءاشرف سے ملاقات قذافی سٹیڈیم میں ہوئی جو آدھے گھنٹے تک جاری رہی۔