کندھکوٹ (نامہ نگار) کچے کے علاقے میں جاگیرانی برادری کے چچا زاد بھائیوں میں بکری فصل میں داخل ہونے پر تصادم کے نتیجے میں چھ افراد قتل جبکہ تین  زخمی ہوگئے۔ نوگو ایریا ہونے کی وجہ سے پولیس نہ پہنچ سکی۔ تفصیلات کے مطابق کندھکوٹ کچے کے علاقے پولیس تھانہ جنگن کی حدود میں نواحی گائوں آدم جاگیرانی میں جاگیرانی برادری کے فریقین میں بکری فصل میں داخل ہونے پر تصادم ہو گیا۔ فائرنگ سے فریقین کے چھ افراد قتل جبکہ تین افراد زخمی ہو گئے۔ قتل ہونے والوں میں مومن، کریمن، صنم، ڈھر، ٹموں، عبید جاگیرانی شامل ہیں۔ پولیس اور ریسکیو ٹیمیں علاقے میں نہ پہنچ سکیں۔ علاقہ ڈاکوئوں کا ہونے کی وجہ سے نوگو ایریا ہے۔ فریقین مورچہ بند ہو گئے۔ دونوں طرف سے فائرنگ کا تبادلہ بھی جاری تھا۔ مزید خونریزی کا اندیشہ ہے۔