اسلام آباد (نوائے وقت رپورٹ) سابق وزیراعظم اور مسلم لیگ ن کے صدر نواز شریف پارلیمنٹ ہاؤس پہنچے تو وزیراعظم شہباز شریف نے ان کا استقبال کیا۔ حمزہ شہباز بھی نواز شریف کے ساتھے تھے۔ ایوان نے تالیاں بجا کر نواز شریف کا استقبال کیا۔ پی پی چیئرمین بلاول بھٹو زرداری ایوان میں آئے تو انہوں نے آتے ہی اپوزیشن لیڈر عمر ایوب سے مصافحہ کیا۔ نواز شریف‘ بلاول بھٹو‘ وزیراعظم شہباز شریف‘ راجہ پرویز اشرف‘ نوید قمر ایک دوسرے سے خوشگوار موڈ میں ملے اور مبارکباد دی۔ اعظم نذیر تارڑ ایوان میں داخل ہوئے تو ایوان نے تالیاں بجا کر ان کا استقبال کیا۔ بلاول بھٹو نے گرم جوشی کے ساتھ نواز شریف سے مصافحہ کیا۔ مولانا فضل الرحمنٰ اپنے اراکین کے ساتھ ایوان میں آئے تو تالیاں بجائی گئیں۔ مولانا فضل الرحمنٰ نے ایوان میں نواز شریف سے سرگوشی میں گفتگو کی۔ نواز شریف اور وزیراعظم شہباز شریف نے نشستوں سے اٹھ کر مولانا فضل الرحمنٰ سے مصافحہ کیا۔ بلاول بھٹو زرداری نے بھی اٹھ کر مولانا فضل الرحمنٰ سے مصافحہ کیا۔ مولانا فضل الرحمنٰ اپوزیشن بنچوں پر اپوزیشن اراکین کے ساتھ بیٹھ گئے۔