چارسدہ:3 دہشت گرد،4 سہولت کار گرفتار: باڑہ،4 بم ناکارہ بنا دئیے گئے

چارسدہ/ خیبر ایجنسی / لاہور (نوائے وقت رپورٹ+ ایجنسیاں + نامہ نگار) چارسدہ کے علاقے مندنی میں سکیورٹی فورسز نے کارروائی کرتے ہوئے تین دہشت گردوں کو گرفتار کے بھاری تعداد میں اسلحہ برآمد کرلیا۔ سکیورٹی ذرائع کے مطابق تینوں دہشت گردوں کا تعلق افغانستان سے ہے۔ دہشت گردوں کو تفتیش کے لئے نامعلوم مقام پر منتقل کردیا گیا ہے۔ علاوہ ازیں سکیورٹی فورسز نے شب قدر چارسدہ کے علاقے سروکلے میں بھی چھاپہ مار کر دہشت گردوں کے 4 سہولت کاروں کو گرفتار کر لیا۔ ادھر خیبر ایجنسی کی تحصیل باڑہ میں سڑک کنارے نصب چار بم ناکارہ بنا دیئے گئے۔ ذرائع کے مطابق منگل کو تحصیل باڑہ کے علاقے نالہ میں سرچ آپریشن کیا گیا۔ حکام کے مطابق ناکارہ بنائے گئے بم دیسی ساختہ تھے۔ علاوہ ازیں لاہور میں پولیس اور قانون نافذکرنے والے اداروں نے دہشت گردی کے خطرات کے پیش نظر سرچ آپریشن کرتے ہوئے26مشتبہ افراد کو حراست میں لے کر تفتیش کے لئے نامعلوم مقام پر منتقل کر دیا ہے۔ باغبانپورہ پولیس نے 3 مشتبہ افراد کو گرفتار کرکے ان کے قبضے سے اسلحہ برآمد کر لیا ہے۔