پنجاب جاب سنٹر پورٹل پر1لاکھ 40 ہزار افراد ، 29 ہزار آجروں نے رجسٹریشن کروا لی

لاہور(نیوز رپورٹر) پنجاب بھر میں ضلعی سطح پر ملازمتوں کے حصول کیلئے پی آئی ٹی بی کے لیبر اینڈ ہیومن ریسورس ڈیپارٹمنٹ کے اشتراک سے وضع کردہ آن لائن پلیٹ فارم پنجاب جاب سنٹر پر 1 لاکھ 40 ہزار سے زائد افراد بطور ملازمت کے متلاشی اپنی رجسٹریشن کروا چکے ہیں جبکہ 29 ہزار افراد بطور کاروباری مالکان رجسٹرڈ ہیں۔ پورٹل کا مقصد آجروں، پروموٹرز، ایمپلائمنٹ ایکسچینج ایجنسیوں، ورکرز اور ملازمت کے متلاشی شہریوں کے درمیان رابطہ قائم کرنا ہے۔ چیئرمین پی آئی ٹی بی فیصل یوسف کا کہنا تھا کہ جاب سنٹر پورٹل کا قیام رہنمائی اور روزگار کے حصول کی معاونت میں ایک اہم قدم ہے جس سے نہ صرف صنعتکاروں بلکہ آجروں کو بھی فائدہ ہوگا۔