آئی سی سی وفدکا چیمپئنز ٹرافی انتظامات ‘سکیورٹی  پر اظہار  اطمینان 

لاہور(سپورٹس رپورٹر)چیئرمین پاکستان کرکٹ بورڈ محسن نقوی سے آئی سی سی کے وفد کی ملاقات، آئی سی سی چیمپئنز ٹرافی ٹورنامنٹ کی تیاریوں کے حوالے سے تفصیلی تبادلہ خیال، آئی سی سی وفدنے کراچی اور راولپنڈی میں چیمپئنز ٹرافی کیلئے کئے انتظامات اور سکیورٹی پر اطمینان کا اظہار کردیا آئی سی سی وفد کی سینئر منیجر ایونٹس سارہ ایڈگر ‘ ایونٹ منیجر و چیمپئنز ٹرافی ایونٹ لیڈ عون محمد زیدی‘ جنرل منیجر کرکٹ وسیم خان‘سکیورٹی منیجر ڈیوڈ مسکر نے چیئرمین پی سی بی محسن نقوی سے ملاقات کے دوران آئی سی سی چیمپئنز ٹرافی ٹورنامنٹ کے سکیورٹی انتظامات پر بھی بات چیت کی ۔ وفد کا کراچی اور راولپنڈی میں چیمپئنز ٹرافی کیلئے کئے انتظامات اور سکیورٹی پر اطمینان کا اظہارکرتے ہوے تسلی بخش قرار دیا۔ چیئرمین پی سی بی محسن نقوی نے آئی سی سی چیمپئنز ٹرافی کیلئے عالمی معیار کے انتظامات کی یقین دہانی کرواتے ہوے کہا کہ سٹیڈیمز کی اپ گریڈیشن کا کام چیمپئنز ٹرافی سے قبل ہر صورت مکمل کر لیا جائیگا۔ تمام ٹیموں کیلئے فول پروف سکیورٹی انتظامات کئے جائیں گے۔ آئی سی سی چیمپئنز ٹرافی ٹورنامنٹ کا پاکستان میں انعقاد ایک اعزاز ہے۔ جتنا بڑا ٹورنامنٹ ہے اس کے مطابق انتظامات کو حتمی شکل دے رہے ہیں۔ تمام ٹیموں کے کھلاڑی پرامن اور محفوظ ماحول میں کرکٹ کے کھیل کو انجوائے کریں گے۔ اپ گریڈیشن کے بعد سٹیڈیمز میں بین الاقوامی معیار کی سہولتیں ہوں گی اور شائقین میچز سے زیادہ محظوظ ہوں گے۔ پاکستانی قوم کرکٹ کے کھیل سے محبت کرتی ہے اور تمام ٹیموں کو سپورٹ کرتے ہیں۔ ملاقات میںپاکستان کرکٹ بورڈ کے ڈائریکٹر انٹرنیشنل کرکٹ عثمان واہلہ۔‘ڈائریکٹر سکیورٹی کرنل ریٹائرڈ خالد محمود‘ہیڈ آف مارکیٹنگ سلمان مسعود بھی موجود تھے۔آئی سی سی کا 5 رکنی وفد اسلام آباد سے لاہور پہنچ گیا، آئی سی سی وفد آج قذافی سٹیڈیم کا دورہ کرے گا۔ذرائع کے مطابق آئی سی سی وفد نے  مصروفیات کے باعث قذافی سٹیڈیم کا دورہ نہیں کیا، پی سی بی حکام کی جانب سے وفد کو سٹیڈیم کے تعمیراتی کاموں پر بریفنگ دی جانی ہے۔