اسرائیل کی جانب سے لبنان میں کئے گئے حالیہ حملوں کے بعد مغربی ایشیا میں صورتحال مزید کشیدہ ہوگئی ہے، مختلف ایئر لائنز نے اس تناظر میں اپنے طیاروں کی پروازیں منسوخ کردی ہیں، تاکہ کسی بھی غیر متوقع صورت حال سے محفوظ رہا جاسکے۔
بین الاقوامی خبر رساں ادارے کی رپورٹ کے مطابق ایئر الجزائر نے لبنان کے لیے اپنی پروازوں کو منسوخ کردیا ہے اور یہ خدمات اگلے حکم تک معطل رہیں گی۔
کے ایل ایم نے تل ابیب کے لیے پروازیں 26 اکتوبر تک منسوخ کردی ہیں، جبکہ ٹرانسویہ ایئر لائن نے 31 مارچ 2025 تک تل ابیب کی تمام پروازیں منسوخ کر دی ہیں، ایئر فرانس نے 17 ستمبر سے بیروت اور تل ابیب کے لیے پروازیں منسوخ کر دیں۔
مغربی ایشیا میں صورتحال مزید کشیدہ ہونے کے بعد امریکی ایئر لائن ڈیلٹا نے نیو یارک سے تل ابیب کے درمیان پروازیں 31 دسمبر تک منسوخ کر دی ہیں۔ ہندوستانی ایئر لائنز ایئر انڈیا نے بھی تل ابیب کے لیے پروازیں منسوخ کر رکھی ہیں۔
برطانوی بجٹ ایئر لائن ایزی جیٹ نے تل ابیب کی تمام پروازیں اپریل میں منسوخ کی تھیں، جو 30 مارچ 2025 کو دوبارہ شروع ہوں گی۔ ہانگ کانگ کی کیتھے پیسیفک ایئر لائن نے تل ابیب کے لیے 27 مارچ 2025 تک تمام پروازیں منسوخ کر دی ہیں۔
جرمنی کی ایئر لائن لفتھانزا نے بھی تل ابیب اور تہران کے لیے پروازیں منسوخ کر دی ہیں۔ بیروت کے لیے پروازیں 30 ستمبر تک بند رہیں گی۔ لاطویا کی ایئر لائن ایئر بالٹک نے بھی تل ابیب کے لیے اپنی پروازیں معطل کر رکھی ہیں۔
برطانوی حکومت نے اپنی ایئر لائنز کو لبنان کے فضائی حدود میں داخل نہ ہونے کی ایڈوائزری جاری کی ہے، جو 8 اگست سے 4 نومبر تک نافذ رہے گی۔یورپ کی بجٹ ایئر لائن رینیر، جرمنی کی سنڈیر ایئر لائن، اور شکاگو کی یونائیٹڈ ایئر لائن نے بھی تل ابیب کی پروازیں منسوخ کی ہیں۔