خانیوال (نمائندہ نوائے وقت، نامہ نگار) لڑکی سے موبائل فون پر دوستی کا المناک نتیجہ، رقیب کی فائرنگ سے 4 سالہ بھتیجے کی جان چلی گئی، گھر کہرام برپا، والدین پر غشی کے دورے ،مقدمہ درج، ایک ملزم گرفتار۔ تفصیل کے مطابق فضل ٹاؤن کے رہائشی احسن کی پیروال کی ثناء نامی لڑکی سے موبائل پر دوستی ہو گئی اس دوستی کا لڑکی کے پہلے سے موجود دوست کو پتہ چلا تو اس نے احسن کو ثناء سے دوستی ختم کرنے کو کہا۔ مگر جب احسن باز نہ آیا تو ملزمان نے اس کے گھر کے سامنے اس پر فائرنگ کردی۔ مگر گولی احسن کی بجائے اس کے چار سالہ بھتیجے حارث کے سر پر لگی۔ جسے نشتر ہسپتال ملتان منتقل کیا گیا تاہم معصوم حارث زخموں کی تاب نہ لاتے ہوئے جاں بحق ہوگیا۔