شاہ تاج پولو کلب نے پانچواں سیرینا ہوٹلز پولو کپ جیت لیا

اسلام آباد ( سپورٹس رپورٹر) اسلام آباد پولو گرائونڈ میں شاہ تاج پولو کلب نے آسیان پولو کلب کو شکست دے کر پانچواں سیرینا ہوٹلز پولوکپ2018ء جیت لیا۔ فائنل میچ کے مہمان خصوصی برٹش ہائی کمشنر ہز ایکسی لینسی تھامس ڈریو تھے انہوں نے کھلاڑیوں میں ٹرافیاں اور تحائف بھی تقسیم کئے۔ ٹورنامنٹ میں چھ ٹیموں نے حصہ لیا جس میںسے شاہ تاج اور آسیان نے مخالف ٹیموں کو شکست دے کر فائنل کیلئے کوالیفائی کیا۔ فائنل میچ کو شائقین کی ایک بڑی تعداد کے علاوہ سیرینا ہوٹلز کے چیف ایگزیکٹیو آفیسر عزیز بولانی اور پریذیڈنٹ باڈی گارڈز کے سابق کمانڈنٹ اور معروف کوہ پیما کرنل (ر) شیر خان نے بھی دیکھا۔ فائنل میچ کے موقع پر سیرینا ہوٹلز کے سی ای او عزیز بولانی نے کہا کہ پولو کا کھیل اسلام آباد میں تیزی سے مقبول ہو رہا ہے۔ یہ بات باعث خوشی ہے کہ سیرینا ہوٹلز سپورٹس ڈپلومیسی کے تحت سکواش، ٹینس اور پولو سمیت مختلف کھیلوں اور صحت مندانہ سرگرمیوںکو باقائدگی کے ساتھ سپانسر کر رہا ہے۔ کھیلوں کے ان مقابلوں کے انعقاد سے معاشرے پر خوشگوار اثرات مرتب ہوتے ہیں۔ہم آئندہ بھی کھیلوں کو بھرپور انداز میں سپانسر کریں گے۔