لاہور(یواین پی) عمر اکمل نے قومی ٹیم میں واپسی کی آس نہ چھوڑی، مڈل آرڈر بیٹر کا کہنا ہے کہ میں سخت محنت کررہا ہوں۔ مڈل آرڈر بیٹر نے کہا کہ میں کراچی کی رمضان کرکٹ میں اپنا نیچرل گیم کھیل رہا ہوں، توقعات کے مطابق پرفارم نہیں کرسکا مگر بْرا وقت کسی پر بھی آجاتا ہے۔انہوں نے کہا کہ مشکل دنوں میں کوئٹہ گلیڈی ایٹرز کے مالک ندیم عمر نے بڑا ساتھ دیا،انکی وجہ سے پی ایس ایل 7کھیلنے کا موقع ملا،کوچ معین خان بھی ٹیم کو ساتھ لے کر چلتے ہیں،میں ان دونوں کا احسان کبھی نہیں بھلاسکتا، سخت محنت کررہا اور پاکستان ٹیم میں واپسی کیلیے پْرامید ہوں،جس کردار میں بھی موقع دیا گیا کوشش ہوگی کہ اچھی کارکردگی دکھاؤں۔مڈل آرڈر بیٹر نے کہا کہ امریکا میں کچھ مصروفیات تھیں، اہلیہ نے بھی مشورہ دیا تھا کہ وہاں ٹریننگ کروں، بہرحال میرا کسی غیر ملک میں سکونت پذیر ہونے کا کوئی ارادہ نہیں۔،ٹی ٹوئنٹی لیگز میں شرکت الگ بات ہے، پاکستان کی وجہ سے ہی دنیا میں ہماری پہچان ہے،میں یہاں ہی رہنا اور قومی ٹیم کیلئے کھیلنا چاہتا ہوں۔