کراچی ( لیڈی رپورٹر)کراچی کے مختلف گرجا گھروں میں ڈاکٹر روتھ فائو کی میموریل سروس کے حوالے سے دعائیہ تقریبات کا انعقادکیاگیا، اس موقع پر مسیحی رہنمائوں وعوام نے آنجہانی ڈاکٹر روتھ فائوکو بھرپور خراج عقیدت پیش کیا ، اس موقع پر آرچ بشپ آف کراچی بشپ جوزف کوٹس نے کہا کہ ڈاکٹر روتھ فائو نے پاکستان میں جذام کے مریضوں کے علاج کے لئے خود کو وقف کردیا تھا، ڈاکٹر روتھ فائوکے ادارے کو جذام کے علاج کے حوالے سے نمایاں مقام حاصل ہوا۔ڈاکٹر روتھ فائو کیساتھ خدمت کا ایک عظیم باب بند ہوگیا۔ وکرجنرل کراچی ریورنڈ فادر صالح ڈائیگو نے کہا کہ رتھ فائو نے ثابت کردیا کہ انسانیت کی خدمت سب سے افضل ہے۔ سینٹ پیٹرک کے پیرش پریسٹ ریورنڈ فادر ماریو روڈریکس نے کہا کہ روتھ فائوکی خدمات فراموش نہیں کی جاسکتیں ۔