جمیکا(پی پی آئی) کنگسٹن میں ہونے والے دوسرے اور سیریز کے آخری ٹیسٹ میں دوسرے روز کھانے کے وقفے تک کھیل شروع نہ ہوسکا۔پاکستان نے پہلے دن کے اختتام پر 4 وکٹوں کے نقصان پر 212 رنز بنالیے ہیں‘ایک بار پھر پاکستانی اوپننگ فیل ہو گئی‘ 2 سکور پر 3 وکٹیں گرنے کے بعد کپتان بابر اعظم اور فواد عالم کے درمیان 158 رنز کی شراکت ‘ بابر اعظم 75 رنز بنا کر آئوٹ‘ فواد عالم 76 رنز پر ریٹائرڈ ہرٹ ہوئے‘ کیماروچ نے  3 وکٹیں  حاصل کیں ۔ روشنی کم ہونے کی وجہ سے پہلے دن کا کھیل جلد ختم کر دیا گیا۔تفصیلات کے مطابق ویسٹ انڈیز کے خلاف دوسرے ٹیسٹ میچ میں قومی ٹیم گر کر سنبھل گئی۔ پہلے ہی اوور میں اوپنر عابد علی ایک رن بنا کر کیمار روچ کو وکٹ دے بیٹھے جس کے بعد اظہر علی بغیر کوئی رن بنائے پویلین لوٹ گئے جبکہ عمران بٹ بھی ایک رن بنا کر آؤٹ ہوگئے۔ ابتدائی تین وکٹیں 2 رنز پر گرنے کے بعد بابر اعظم اور فواد عالم نے ذمہ دارانہ بیٹنگ کرتے ہوئے نصف سنچریاں سکور کر دیں۔کپتان بابر اعظم 75 رنز بنا کر آؤٹ ہوئے جبکہ فواد عالم نے 76 رنز اسکور کیے اور وہ ریٹائرڈ ہرٹ ہوگئے۔ پہلے دن کھیل کے اختتام تک پاکستان ٹیم نے 4 وکٹوں پر 212 رنز بنالیے ہیں جبکہ محمد رضوان 22 اور فہیم اشرف 23 رنز بنا کر کریز پر موجود ہیں۔ ویسٹ انڈیز کی جانب سے کیمار روچ نے 3 اور جیڈن سیلز نے ایک کھلاڑی کو آؤٹ کیا۔یاد رہے قومی ٹیم میں ایک تبدیلی کی گئی ہے یاسر شاہ کی جگہ نعمان علی کو فائنل الیون کا حصہ بنایا گیا ہے جبکہ میزبان ٹیم میں بھی ایک تبدیلی کی گئی ہے، الزاری جوزف کو ٹیم میں شامل کیا گیا ہے۔ واضح رہے کہ پہلے ٹیسٹ میچ میں ویسٹ انڈیز نے پاکستان کو سنسنی خیز مقابلے کے بعد ایک وکٹ سے شکست دی تھی۔