لاہور (خصوصی نامہ نگار) مرکزی جمعت اہل حدیث کے سربراہ سینیٹر پروفیسر ساجد میر نے کہ ہے کہ جماعت اسلام نے جب بھی سولو فلائٹ کی ہمیشہ کریش ہوئی۔ انہیں پی ڈی ایم پر تنقید سے پہلے سولو فلائٹ کی بناء پر ملنے والی اپنی ناکامیوں پر غور کرنا ہوگا۔ اس امر کا اظہار انہوں نے مرکز راوی روڈ میں ڈاکٹر عبدالغفور راشد  کے اعزاز میں منعقدہ استقبالیہ سے خطاب کے بعد میڈیا سے گفتگو کرتے ہوئے کیا۔ ساجد میر نے کہا کہ ضروری نہیں کہ جلسوں پر جلوسوں سے استعفیٰ مل جائے ہم بھی جانتے ہیں کہ نام کسی اور چیز کا لیا جاتا ہے جو حاصل ہونے والی چیزیں ہیں وہ کچھ اور ہوتی ہیں پی ڈی ایم کی تحریک سے ری الیکشن یا مڈٹرم الیکشن ہی ہو جائیں تو بڑی کامیاب ہوگی۔ ضمنی انتخابات میں شرکت کا  فیصلہ پی ڈی ایم کے سربراہ اجلاس  میں کیا جائیگا۔ تقریب سے مولانا عبدالرشید حجازی، حافظ یونس آزاد، ڈاکٹر ریاض الرحمان یزدانی، حافظ فیصل افضل شیخ، حافظ عتیق اللہ عمر، حافظ سلمان اعظم، حافظ عبدالغفار مکی، حافظ اکرم ایڈووکیٹ دیگر نے خطاب کیا۔