یوم جناح انٹر ڈسٹرکٹ ہاکی ٹورنامنٹ، فائف کور کی پہلی فتح

کراچی ( اسپورٹس رپورٹر ) یوم جناح آل کراچی ٹاپ سٹی ون انٹر ڈسٹرکٹ ہاکی چیمپئن کے آٹھویں روز مزید دو میچز کے فیصلے ہوگئے،پول اے کا اہم میچ ڈسٹرکٹ ساوتھ اور کور فائف کے درمیان کھیلا گیا، ایونٹ میں فتح کو ترستی کور فائف نے ساؤتھ کو 3-6 سے زیر کرکے پہلی کامیابی حاصل کرلی، تاہم شکست کے باوجود ڈسٹرکٹ ساؤتھ کی فائنل فور میں رسائی کا سفر جاری ہے۔ میچ کے اختتام پر سرسید انجینئرنگ اینڈ ٹیکنالوجی یونیورسٹی کے چانسلر پروفیسر جاوید انوار نے سینئر اسپورٹس جرنلسٹ عبدالماجد بھٹی، ٹاپ سٹی ون کے جی ایم عمران سلیم, بھٹائی رینجرز کے میجرعمران حیدر،  پی ایچ ایف کے حیدر حسین اور کنوینئر اے آئی ٹی محمد ارشد خان کے ہمراہ فاتح ٹیم کے محمد زنیر سرور کو مینآاف دی میچ ایوارڈ سے نوازا۔ اس موقع پر سینئیر رپورٹر عبدلماجد بھٹی اور سرسید انجینئرنگ اینڈ ٹیکنالوجی یونیورسٹی کے چانسلر پروفیسرجاوید انوار کا کہنا تھا کہ کے ایچ اے اور ٹاپ سٹی ون کی کاوشیں قومی کھیل کی بحالی میں اہم سنگ میل ثابت ہونگی۔ دوسرے میچ میں ڈسٹرکٹ کورنگی نے پاکستان رینجرز کو 1-2 سے شکست دیدی،فاتح ٹیم کے میسم عباس نے 18 ویں اور خضر الیاس نے 59 ویں منٹ میں جبکہ پاکستان رینجرز کے سہیل عباس نے 40 ویں منٹ میں گول کئے، بہترین کھیل پیش کرنے پر ڈسٹرکٹ کورنگی کے تیمور شیخ ٹاپ سٹی مین آف دی میچ پانچ ہزار روپے کیش ایوارڈ کے حقدار قرار دیئے گئے۔