کراچی(نیوز رپورٹر) اعلیٰ ثانوی تعلیمی بورڈ کراچی نے اعلان کیا ہے کہ انٹرمیڈیٹ سال دوم کامرس ریگولر اور آرٹس ریگولر کے سالانہ امتحانات برائے 2021ء (پہلے مرحلہ) کے اسکروٹنی فارم جمعرات 20جنوری 2022ء تک وصول کیے جائیں گے۔ اپنے پرچوں کی اسکروٹنی کروانے کے خواہشمند طلبہ و طالبات اسکروٹنی فارم بمع فیس درج بالا تاریخوں میں بورڈ آفس میں واقع یونائیڈ بینک لمیٹڈ (UBL)کے بوتھ میں جمع کرواسکتے ہیں۔ تاریخ گزرنے کے بعد کوئی فارم قبول نہیں کیا جائے گا۔ یاد رہے انٹربورڈ کراچی کی طرف سے طلباء کی مشکلات کے پیش نظر کراچی میں UBLکی تمام برانچوں میں فیس جمع کروانے کی سہولت بھی متعارف کروائی جاچکی ہے۔ درج بالا گروپس کے امیدواروں کی مارکس شیٹس متعلقہ کالجوں کو بھیج دی گئی ہیں، طلباء اپنے کالجوں سے اپنی مارکس شیٹس وصول کرسکتے ہیں۔ علاوہ ازیں انٹرمیڈیٹ سال دوم کامرس ریگولر اور آرٹس ریگولر گروپس کے سالانہ امتحانات برائے 2021 ء (دوسرے مرحلہ)کی مارکس شیٹس تیار ہوگئی ہیں، کالجوں کے نمائندے اپنے پرنسپل کے اتھارٹی لیٹرکے ساتھ بروز منگل 21دسمبر 2021ء سے اپنے کالجوں کی مارکس شیٹس انٹربورڈ کے متعلقہ سیکشن سے وصول کرسکتے ہیں۔