کراچی (اسپورٹس رپورٹر) رائٹ ٹو پلے پاکستان کے زیر اہتمام ہاکی کلب آف پاکستان کراچی میں کمیونٹی ہاکی ٹورنامنٹ کاآج (جمعرات)افتتاح ہو گا ۔تقریب کے مہمان خصوصی ترجمان سندھ حکومت بیرسٹرمرتضی وہاب ہوںگے ۔تفصیلات کے مطابق رائٹ ٹو پلے پاکستان کے زیراہتمام کمیونٹی ہاکی ٹورنامنٹ جمعرات سے شروع ہوگا ۔تاریخ میں پہلی بارکراچی کے غیر رسمی تعلیمی مراکز اور یتیم خانے قومی کھیل کے فروغ میں حصہ لے رہے ہیں ۔یہ پروگرام رائٹ ٹو پلے پاکستان کے پروگرام منیجر عطا محمد سومرو کی نگرانی میں منعقد کیا جارہا ہے۔ ٹورنامنٹ میں 12ٹیمیں حصہ لے رہی ہیں جن میں سے 4ٹیمیں یتیم لڑکیوں کی اور 8ٹیمیں یتیم لڑکوں کی ہیں۔ہر ٹیم 15کھلاڑیوں کے اسکواڈ پر مشتمل ہوگی جبکہ مجموعی طور پر 180کھلاڑی اس ٹورنامنٹ میں حصہ لیںگے ۔ ان بچوں کو رائٹ ٹو پلے کے پروجیکٹ اسسٹنٹ کمیل عباس اور ان کی ٹیم نے شروع سے ہی کھیل کی تربیت دی ہے۔یہ ٹورنامنٹ قومی کھیل کو فروغ دینے اور روشن مستقبل کے لیے کھلاڑی پیدا کرنے کے لیے ایک قدم ہے۔ٹورنامنٹ کی افتتاحی تقریب صبح 9بجے اور اختتامی تقریب 3بجے ہوگی ۔سابق ایڈمنسٹریٹرکراچی اور ترجمان سندھ حکومت بیرسٹر مرتضی وہاب تقریب کے مہمان خصوصی ہوںگے۔