دونوں ٹیمیں رواں سیزن میں 2 مرتبہ آمنے سامنے آئیں، ایک ،ایک میچ جیتا،ایونٹ کا پہلا ایلیمنیٹر میچ پشاور زلمی اور اسلام آباد یونائیٹڈ کے مابین (کل) کھیلا جائیگا
پاکستان سپر لیگ(پی ایس ایل) سیون کے پلے آف مرحلے کا(کل)بدھ سے لاہور میں آغاز ہو گا، پہلے کوالیفائر میں ملتان سلطان او ر لاہور قلندرز کی ٹیمیںآمنے سامنے ہوں گے۔لاہور میں پی ایس ایل سیون فیصلہ کن مرحلے میں داخل ہو گیا۔ ایونٹ کا پہلا کوالیفائر بدھ کوملتان سلطانز اور لاہور قلندرز کے درمیان شیڈول ہے۔ شام ساڑھے سات بجے قذافی سٹیڈیم میں زور کا جوڑ پڑے گا۔ ملتان سلطانز اور لاہور قلندرزپی ایس ایل سیون میں دو مرتبہ آمنے سامنے آ چکے، کراچی میں ہونے والا مقابلہ سلطانز کے نام رہا تو لاہور میں قلندرز نے میدان مار لیا۔ایونٹ کے بہترین بلے باز کے لیے بھی دونوں ٹیموں کے درمیان تگڑا مقابلہ جاری ہے۔ لاہور قلندرز کے فخر زمان 521رنز بنا کر سر فہرست ہیں، 479رنز کے ساتھ محمد رضوان کی دوسری پوزیشن ہے۔ ریکارڈ نومقابلے جیت کر پلے آف تک پہنچنے والی ٹیم ملتان سلطان جیت کے لیے پر عزم ہے۔دوسری جانب ٹیم لاہور قلندرز نے بھی فتح کے ساتھ فائنل کے لیے کوالیفائی کرنے پر نظریں جما لیں۔ دونوں ٹیمیں اب تک ایک ایک مرتبہ پی ایس ایل کا فائنل کھیل چکی ہیں۔ایونٹ کا پہلا ایلیمنیٹر پشاور زلمی اور اسلام آباد یونائیٹڈ کے مابین جمعرات کو کھیلا جائیگا جبکہ دوسرا ایلیمنیٹر میچ 25فروری کو کھیلا جائیگا ۔پاکستان سپر لیگ(پی ایس ایل) سیون کا فائنل27فروری کو قذافی سٹیڈیم لاہور میں کھیلا جائیگا۔