پی ایس ایل اچھا برانڈ‘پاکستان فاسٹ بائولرز کی وجہ سے مشہور: عمران طاہر

لاہور(سپورٹس رپورٹر)کراچی کنگز کے سپنر عمران طاہر نے کہا ہے کہ اگرچہ ہمارا آغاز اچھا نہیں ہوا لیکن ہم اب آگے جیت ہی دیکھ رہے ہیں۔ میں یہ نہیں مانتا کہ ہم نے اچھی کرکٹ نہیں کھیلی۔ ہم قریب جا کر میچز ہارے، مجھے کوئی خرابی نظر نہیں آئی۔ ملتان میں پہلے بھی کھیل چکا ہوں یہاں پر بہت سپورٹ ملتی ہے۔انہوں نے پی ایس ایل کو اچھا برانڈ قرار دیااور کہا کہ پی ایس ایل میں اب تک پیسرز نے اچھی بائولنگ کی ہے، ملتان میں ہوم ٹیم کیخلاف ہائی سکورنگ گیم ہو گا۔عمران طاہر نے کہا کہ ملتان ٹیم کے احسان اللہ واحد بائولر ہے جو تسلسل کیساتھ 150 کی سپیڈ سے بائولنگ کر رہا ہے۔ پاکستان فاسٹ بائولرز کی وجہ سے ہی جانا جاتا ہے۔ کراچی کنگز کے پاس ایسے بیٹرز ہیں جو احسان اللہ کی پیس کو کھیل سکتے ہیں۔ اس وقت میں سکھانے سے زیادہ کھیلنے سے انجوائے کر رہا ہوں۔ اس مرتبہ پی ایس ایل کنڈیشنز پہلے سے بہت مختلف ہیں، بائولرز کیلئے اوس کی وجہ سے ٹف کنڈیشنز ہیں۔ میں جہاں بھی کھیلتا ہوں اپنے رول کے مطابق کھیلتا ہوں۔ اسامہ میر، شاداب خان اور عثمان قادر تینوں اچھے لیگ سپنرز ہیں، یہ بڑی اچھی بات ہے کہ اتنے اچھے سپنرز پی ایس ایل کھیل رہے ہیں۔