لاہور(سپورٹس رپورٹر)پی ایس ایل 9 میں کراچی کنگز کے کپتان شان مسعود کا کہنا ہے کہ ملتان نے ہمارے خلاف اچھا میچ جیتا مگر ہم نے زبردست واپسی کی ہے۔میچ کے بعد گفتگو کرتے ہوئے کپتان شان مسعود نے کہا کہ میر حمزہ نے شاندار بائولنگ کی، شعیب ملک نے صائم ایوب کی بڑی وکٹ حاصل کی۔ بائولرز نے اچھی بائولنگ کی جس کی وجہ سے زلمی کو کم سکور پر محدود رکھا۔ انسان سے غلطیاں ہوتی ہیں لیکن ہم نے ان سے سیکھا ہے، خوش قسمت ہوں کہ میرے ساتھ کئی تجربہ کار کھلاڑی موجود ہیں۔کراچی کنگز کے فاسٹ بائولر حسن علی نے پاکستان سپر لیگ 9 میں اپنا ہدف بتادیا۔ قذافی سٹیڈیم لاہور میں پشاور زلمی کیخلاف میچ کے بعد پریس کانفرنس کرتے ہوئے حسن علی کا کہنا تھا کہ میرا ہدف بہترین بائولر بننا ہے ابھی ایک ایک میچ کو دیکھ رہے ہیں۔ ڈریسنگ روم بہت اچھا ہے جہاں حسن علی ہو اچھا ہوجاتا ہے۔ بائولنگ کر کے اچھا لگا، ردھم میں واپس آیا، ہمیں تھوڑی کم سپورٹ ملی لیکن اچھا کھیلے تو سپورٹ بھی ملی۔ شعیب ملک نے پہلی گیند پر وکٹ لے کر ہمیں مومینٹم دیا۔ شان مسعود کی کپتانی بہت اچھی جارہی ہے، اپنی ٹیم میں انجوائے کر رہا ہوں۔ نوجوان کھلاڑیوں کیلئے بڑا اچھا موقع ہے کہ خود کو منوائیں۔ کراچی کنگز کے فاسٹ بائولر میر حمزہ نے کہا کہ کپتان اور مینجمنٹ نے مجھے وکٹیں لینے کا ٹاسک دیا تھا۔میچ کے بعد گفتگو کرتے ہوئے کہا کہ ٹیم جیتی ہے جس کی بے حد خوشی ہے، تمام بائولرز نے بہترین بائولنگ کی۔ تمام بائولرز نے بہترین بائولنگ کی، شعیب ملک اور پولارڈ نے زبردست بیٹنگ کی جس سے ہدف پر پہنچنے میں آسانی ہوئی۔کپتان اور مینجمنٹ نے مجھے وکٹیں لینے کا ٹاسک دیا تھا، کوشش یہی تھی وکٹیں حاصل کروں۔