کراچی(نوائے وقت رپورٹ) کورنگی عوامی کالونی میں پولیس اور ڈاکووؤں کے درمیان فائرنگ کے تبادلے میں دو ڈکیت ہلاک ہوگئے۔ اس دوران فائرنگ کی زد میں آکر پنکچر والا جاں بحق ہوگیا۔ سمن آباد میں مبینہ مقابلے میں ایک ڈکیت مارا گیا اور ایک زخمی حالت میں گرفتار ہوگیا۔ عوامی کالونی تھانے کے علاقے کورنگی نمبر ساڑھے 3 مدینہ کالونی پی ایس او پمپ کے قریب پولیس اور ڈاکوؤں کے درمیان فائرنگ کے تبادلے میں ایک ڈاکو موقع پر ہلاک ہوگیا جبکہ ایک ڈاکو کو زخمی حالت میں گرفتار کرلیا گیا۔  پولیس اور ڈاکوؤں کے درمیان فائرنگ کے تبادلے میں پٹرول پمپ سے متصل پنکچر کی دکان کے کاؤنٹر پر ملازم بھی شدید زخمی ہوگیا۔ زخمی ڈاکو اور ملازم ہسپتال میں دم توڑ گئے۔ پولیس مقابلے کا ایک اور واقعہ ایف بی ایریا بلاک 19 سمن آباد میں پیش آیا جہاں کوئٹہ بابا جان ہوٹل کے قریب مقابلے کے دوران ایک ڈکیت ہلاک ا ور ایک زخمی حالت میں گرفتار کر لیا گیا۔