لاہور دھماکہ میں قیمتی انسانی جانوں کے ضیاع پر بہت افسوس ہے: عبدالقادر گل

کامونکی ( نمائندہ خصوصی ) لاہور انار کلی بازار میں بم دھماکہ میں قیمتی انسانی جانوں کے ضیاع پر بہت افسوس ہوا ہے،ملک دشمن عناصر ایسی بزدلانہ کارروائیوں سے پاکستانی عوام کے حوصلوں کو پست نہیں کرسکتے۔ان خیالات کا اظہار چودھری عبدالقادر گل ایڈووکیٹ، سابق چیئرمین یونین کونسل سادھوکے چودھری محمد گلفام ورک،سابق ناظم یونین کونسل چودھری محمد نعیم بلا،سماجی سیاسی رہنما چودھری آصف شفیق آرائیں،سیاسی و مذہبی رہنما حافظ عبدالرحمن اور امیدوار برائے میئر ضلع گوجرانوالہ چودھری ضیا اللہ سندھو نے اپنے اپنے بیان میں لاہور میں ہونیوالے بم دھماکے کی شدید مذمت کرتے ہوئے کیا۔انہوں نے کہا کہ دہشت گرد کسی نرمی کے مستحق نہیں دہشت گردوں اور ان کے سہولت کاروں کے خلاف آہنی ہاتھوں سے نمٹا جائے،لاہور بم دھماکہ امن و امان کی صورتحال خراب کرنے کی ایک بزدلانہ کارروائی ہے۔ نیشنل ایکشن پروگرام پر عمل درآمد وقت کی ضرورت ہے۔